Habari

Upungufu wa Mtaji Wapelekea BoT Kuchukua Usimamizi wa Benki ya Biashara ya China

Uamuzi huo umelenga kuhakikisha Benki hiyo inarudi katika uwezo wa kuendesha shughuli za kibenki kwa kuzingatia kanuni na taratibu zinazohitajika

Benki Kuu ya Tanzania (BoT) imetangaza kuchukua usimamizi wa Benki ya Biashara ya China kuanzia leo Novemba 19, 2020.

 

Uamuzi huo umefikiwa baada ya Benki Kuu kugundua kuwa benki hiyo ina upungufu mkubwa wa mtaji kinyume na matakwa ya Sheria ya Benki na Taasisi za Fedha ya 2006.

 

Akizungumza jijini Dodoma leo, Gavana wa BoT, Prof. Frolens Luoga ameweka wazi kuwa BoT ina mamlaka ya kuchukua hatua mbalimbali ikiwemo kuifilisi Benki yoyote pindi inaposhindwa kukidhi masharti ya kuwa na akiba ya kutosha kuweza kuendesha shughuli za kibenki ili kulinda wateja wa benki hiyo pamoja na sekta ya fedha.

 

Uamuzi huo wa kuiweka Benki ya CCB chini ya BoT umelenga kuhakikisha Benki hiyo inarudi katika uwezo wa kuendesha shughuli za kibenki kwa kuzingatia kanuni na taratibu zinazohitajika.

 

Pamoja na hatua hiyo, BoT imevunja Bodi ya Wakurugenzi wa Benki ya CCB na mabadiliko yote yanakusudiwa kuanza rasmi leo Novemba 19, 2020.

 

Aidha, CCB itasitisha shughuli zake kwa takribani siku 90 mpaka pale Benki Kuu ya Tanzania itakapotoa maelekezo zaidi juu ya utaratibu unaohitajika.

 

Benki ya Biashara ya China ilianza shughuli zake rasmi mnamo Novemba 2018 ikiwa na lengo la kusaidia makampuni ya China yanayoendeshwa nchini Tanzania, pia kuwawezesha Watanzania wanaofanya biashara nchini China.