Habari

Umoja wa Afrika (AU) Wamfuta Kazi Mkuu Wake wa Usalama kwa Tuhuma za Usaliti

Raia wa Ethiopia Gebreegziabher Mebratu Melese ambaye ni Mkuu wa Masuala ya Usalama wa Umoja wa Afrika (AU) amefutwa kazi na Mwenyekiti wa Umoja huo, Moussa Faki Mahamat baada ya Serikali ya Ethiopia kumtuhumu kwa kukosa uaminifu.

Hatua hii inakuja huku Taifa hilo likikabiliwa na mapigano kati ya Majeshi ya Serikali na vikosi vya Jimbo la Tigray.

Bw. Moussa Faki alichukua hatua hiyo Novemba 11 baada ya Wizara ya Ulinzi ya Ethiopia kuuandikia barua Umoja wa Afrika(au) ikimtuhumu Bw. Malese kwa kukosa uaminifu.

Mashambulizi ya ndege za kivita na vikosi vya ardhini dhidi ya vikosi vya Tigray yamepelekea vifo kwa mamia na kusababisha idadi kubwa ya wakimbizi kukimbilia nchi jirani ya Sudan.

Mashambulizi hayo ya vikosi vya Serikali yalianza Novemba 4 pale Waziri Mkuu Abiy Ahmed alipotangaza vita na vikosi vya Jimbo hilo akivituhumu kwa kushambulia kambi za jeshi na kudharau maagizo ya Serikali yake.

Kwenye barua iliyotoka kwa Waziri wa Ulinzi wa Ethiopia kwenda AU imemtuhumu Gebreegziabher ambaye ana cheo cha Meja Jenerali kuwa hana nia thabiti na malengo ya Umoja wa Afrika wala Serikali ya Ethiopia.

Siku ya jana Alhamisi Serikali ya Ethiopia ilitoa taarifa kuwa inawashikilia watu takribani 150 ambao ni wapiganaji wa vikosi vya jimbo la Tigray ambao walikuwa kwenye jiji la Addis Ababa na miji mingine wakiwa katika mipango ya kufanya mashambulizi ya kigaidi.

Makao Makuu ya Umoja wa Afrika (AU) yapo jijini Addis Ababa nchini Ethiopia. Takribani vikosi 4,400 vya Ethiopia vipo nchini Somalia vikilinda Amani.