Kamati ya Maadili ya Shirikisho la Soka Duniani, FIFA, limemfungia kwa miaka mitano Rais wa Shirikisho la Soka Barani Afrika CAF, Ahmad Ahmad baada ya kukutwa na hatia ya uvinjifu wa maadili.

Rais huyo hatoruhusiwa kujihusisha na shughuli zote zinazohusiana na soka aidha la Kitaifa au Kimataifa. Raia huyo wa Madagascar ambaye aliingia madarakani mwaka 2017 pia ametakiwa kulipa faini ya Dola za Marekani 22,000.

Kamati hiyo ya Maadili ya Fifa imemkuta Bw. Ahmad na hatia matumizi mabaya ya ofisi, matumizi ya fedha na kutoa zawadi na upendeleo kwa baadhi ya watu kwa nafasi yake kama Rais wa CAF.

Hatua hii inakuja huku Bw. Ahmad akiwa kwenye mchakato wa uchaguzi wa kugombea muhula mwingine ili kuendelea kuliongoza shirikisho hilo. Nafasi yake kama Rais wa CAF inamfanya anakuwa Makamu wa Rais wa FIFA.

Miaka minne ya utawala wa Ahmad iligubikwa na tuhuma za ubadhirifu wa fedha kwenye makao makuu ya CAF ambayo yapo jijini Cairo, Misri.

Juni 2019 Rais huyo alishikiliwa kwa mahojiano huko Paris nchini Ufaransa kwa tuhuma zinazohusiana na uongozi wake ndani ya CAF.

Ukaguzi wa fedha uliofanywa na FIFA ulionyesha kuna upotevu wa fedha ambapo kiasi cha Dola za Marekani 100,000 zililipwa kwa watu 18 akiwemo Rais Ahmad kwa ajili ya kusafiri kwenda kwenye Hijja nchini Saudi Arabia.

Uchaguzi Mkuu wa CAF unatarajiwa kufanyika Machi, 2021 huko Rabat nchini Morocco. Ahmad aliingia madarakani mwaka 2017 kwa kuungwa mkono na viongozi wa FIFA ili kumuondoa madarakani Issa Hayatou aliyeongoza shirikisho hilo kwa miaka 29.