Rais wa Jamhuri ya Muungano wa Tanzania, Samia Suluhu Hassan leo tarehe 01/04/2021 amewaapisha Katibu Mkuu Kiongozi pamoja na Mawaziri, Manaibu Waziri wa Wizara mbalimbali aliowateua hapo jana tarehe 31/03/2021 Ikulu Chamwino.

Akizungumza mara baada ya uapisho huo Rais Samia Suluhu ameionya Wizara ya Fedha kutumia nguvu na vitisho kukusanya Kodi na hivyo kuleta usumbufu mkubwa kwa ufanyaji wa Biashara nchini kuwa mgumu na kupelekea kuua Biashara nyingi nchini Tanzania.

Pia Rais ameiagiza Wizara ya Fedha kwenda kuweka Mazingira bora ya ukusanyaji wa Fedha ikiwa ni pamoja na kuongeza vyanzo vya Kodi na sio kuweka kodi kubwa ambazo zitaumiza wafanyabiashara, Mhe. Rais amesema “Waziri wa Fedha katanue wigo wa kukusanya Kodi, hii mbinu mnatumia sasa hivi ya maguvu na vurugu mnaua walipa Kodi, mnaua Biashara”

Aidha, Rais ameitaka Wizara ya Fedha kukusanya Kodi na Mapato ambapo ameitaka Wizara ya Fedha kukusanya kiasi cha zaidi ya shillingi trillioni 2 kwa mwaka.