Habari

Maafisa Watendaji, Maendeleo na Ustawi Watakiwa kuwa Chachu ya Utatuzi wa Changamoto za Afya ya Uzazi kwa Walemavu

"Tutapitishwa kwenye Mradi naomba tuupokee tukausimamie kulingana na malengo ambayo yamepangwa" amesema Luteganya.

Afisa Maendeleo ya Jamii Wilaya ya Kigamboni, Happy luteganya amewataka Maafisa maendeleo, watendaji na maafisa ustawi wa kata kuwa chachu ya utatuzi wa matatizo ya Afya ya uzazi yanayowakabili walemavu katika maeneo yao 

Akizungumza katika uzinduzi wa Mradi wa Uchechemuzi wa Haki ya afya salama ya uzazi kwa watu wenye ulemavu katika manispaa   ya Kigamboni utakaotekelezwa katika kata zote za manispaa hiyo uliobuniwa na Taasisi ya Building Inclusive Society Tanzania Organization (BITSO) Afisa huyo amesema kuwa watendaji hao wanapaswa kuhakikisha kuwa wanatoa ushirikiano wa kutosha kwa maafisa wa BITSO watakaofika katika utekelezaji wa Mradi huo.

"Tutapitishwa kwenye Mradi naomba tuupokee tukausimamie kulingana na malengo ambayo yamepangwa" amesema Luteganya.

katika hatua nyingine, Luteganya amewashukuru BITSO kwa uzinduzi wa Mradi huo katika wilaya ya Kigamboni kwani wangeweza kuutekeleza mradi huo katika wilaya nyingine lakini wameamua kuanza na wilaya ya kigamboni hivyo wilaya hiyo inapaswa kuwa ya mfano ili kurahisisha utekelezaji wa mradi huo katika maeneo mengine. 

Mratibu wa Mradi huo, Rajabu Mpilipili amesema kuwa  mradi huo utahusisha mafunzo mbalimbali kwa watu wenye ulemavu na wasio na ulemavu  kwani watu wasio na ulemavu ndio wanaoishi na watu wenye ulemavu katika Jamii hivyo nao pia ni wadau Muhimu katika suala hilo 

Mpilipili, amesema kuwa kumekuwa na changamoto ya upatikanaji wa afya salama ya uzazi kwa watu wenye ulemavu na wengi hawapewi haki zao za msingi zinazohitajika hivyo taasisi hiyo imekuja na Mradi huo ili kuwawezesha walemavu kupata haki hizo. 

Mkurugenzi wa Taasisi ya BITSO, Pascal Majula Silvester amesema kuwa Taasisi hiyo inamalengo ya kuhakikisha kuwa watu wenye ulemavu wanapata huduma ya Afya kwa usalama zaidi kama haki yao ya msingi ya kibinaadamu na kueleza kwamba Taasisi hiyo imejikita zaidi katika kuwasaidia walemavu kupata haki zao za msingi.