Tuzo za Grammy za mwaka 2021 zinaahirishwa hadi Machi 14 kwa sababu ya wasiwasi unaohusiana na janga la virusi vya corona.

Recording academy ambao  ndiyo wanahusika na ugawaji wa tuzo hizi wamethibitisha katika taarifa inayoeleza kwamba inasogeza mbele tuzo hizo za kila mwaka kutoka Januari hadi Jumapili, Machi 14 kwa sababu ya kuongezeka kwa visa vya janga la corona hasa katika mji wa Los Angeles, ambapo hafla hiyo itafanyika.

"Baada ya mazungumzo mazito na wataalam wa afya, washereheshaji wetu na wasanii waliopangwa kushiriki, tunasogeza mbele Tuzo za Grammy ambapo zitaenda kutangazwa Jumapili, Machi 14, 2021," taarifa ilisomeka.

"Hali mbaya ya COVID huko Los Angeles, na huduma za hospitali kufurika, ICU kuzidiwa, na mwongozo mpya kutoka kwa Serikali na serikali za mitaa zimetusaidia kuona kuwa uamuzi wetu wa kuahirisha onyesho letu lilikuwa ni jambo sahihi,” taarifa hiyo ilisomeka.

“Hakuna kitu cha muhimu zaidi kuliko afya na usalama wa wale waliopo katika jamii yetu ya muziki na mamia ya watu wanaofanya kazi bila kuchoka kutayarisha onyesho hili. Tunataka kuwashukuru wasanii wote wenye talanta, wafanyakazi, wauzaji wetu na hasa wasanii walioteuliwa kushiriki tuzo hizi za mwaka huu kwa uelewa, uvumilivu na utayari wa kufanya kazi nasi hasa tunapopitia nyakati hizi ngumu ambazo hazijawahi kutokea.” 

Taarifa hiyo ilisainiwa na Harvey Mason Jr., Mkurugenzi wa Recording Academy.

Tuzo hizo za Grammy zitafanyika Los Angeles katika Kituo cha Staples, Kaunti ya Los Angeles, ambako ndio kitovu cha ugonjwa huko California, ambako umezidi vifo 10,000 na imekuwa na asilimia 40 ya vifo . Beyonce ndiye anayeongoza katika tuzo hizo mwaka huu akiwa na uteuzi katika vitengo tisa.